grill-me في Claude: أفضل Skill لترتيب فكرتك قبل تنفيذها بالذكاء الاصطناعي
لو بتستخدم أدوات الذكاء الاصطناعي في البرمجة أو تنفيذ الأفكار، غالبًا قابلتك المشكلة دي قبل كده: الفكرة موجودة في دماغك، لكن أول ما تيجي تشرحها للـAI تكتشف إن في تفاصيل كتير ناقصة، أو إنك مش عارف تبدأ منين أصلًا.
هنا بتيجي فكرة Skill اسمها grill-me في Claude، والاسم حرفيًا معناه بالعربي "اشويني".
الاسم غريب شوية، لكن فكرته بتشرح بالظبط اللي الـSkill بتعمله معاك.
بدل ما تدخل على Claude وتكتب Prompt طويل وتحاول تفتكر كل تفاصيل المشروع مرة واحدة، أنت بتبدأ بفكرة بسيطة جدًا.
مثلًا تقول له:
"أنا عايز أعمل موقع برمجي."
ومن هنا يبدأ دور الـSkill.
بدل ما Claude يفترض من نفسه شكل الموقع أو يبدأ ينفذ على معلومات ناقصة، يبدأ يسألك أسئلة عن الفكرة واحدة واحدة.
كل سؤال بيخليك تحدد جزء أكتر من المشروع، وإنت تجاوب، وبعدها يظهر سؤال تاني، وهكذا.
الفكرة هنا مش في إنك تعرف تكتب Prompt احترافي من أول مرة، بالعكس، الـSkill بتساعدك تطلع التفاصيل اللي أصلًا موجودة في دماغك لكن يمكن ماكنتش واخد بالك إنك محتاج توضحها.
وده مفيد جدًا خصوصًا لو أنت داخل تعمل مشروع ومش محدد كل حاجة من البداية.
ممكن تكون عارف إنك عايز تعمل موقع، لكن لسه ما فكرتش بالتفصيل في كل جزء منه. ومع الأسئلة اللي بتظهر لك، الصورة تبدأ تبقى أوضح واحدة واحدة.
طريقة إضافة grill-me إلى Claude
استخدام الـSkill نفسه مش معقد.
بعد ما تحمل ملف grill-me، تدخل على Claude، وبعدها تفتح Settings.
من الإعدادات تدخل على قسم Skills، وبعدها تضغط على علامة الـPlus وتضيف ملف الـSkill اللي حملته.
بعد إضافة الملف، افتح Chat جديد واكتب أمر:
/grillme
بعدها اكتب الفكرة اللي عايز تشتغل عليها.
ممكن تبدأ بحاجة بسيطة مثل:
"أنا عايز أعمل موقع برمجي."
Claude وقتها يبدأ يسألك عن الفكرة، وإنت تجاوب على كل سؤال لحد ما توصل لشكل أوضح للمشروع اللي عايز تنفذه.
الميزة بالنسبة لي هنا إنك مش محتاج تقعد قبلها تجهز Prompt ضخم أو تحاول تتوقع كل المعلومات اللي Claude ممكن يحتاجها.
أنت فقط تبدأ بالفكرة، والأسئلة هي اللي تساعدك ترتب باقي التفاصيل.
وده ممكن يوفر عليك لخبطة كبيرة بتحصل لما تبدأ مشروع بالـAI بسرعة، وبعد شوية تكتشف إن النتيجة مش هي اللي كنت متخيلها لأن تفاصيل مهمة ما اتقالتش من البداية.
في النهاية، grill-me مش Skill هدفها تعمل الشغل بدل منك، لكن قيمتها الحقيقية إنها تساعدك تفهم فكرتك بشكل أوضح قبل ما تدخل في التنفيذ.
وده في مشاريع الـAI والبرمجة تحديدًا ممكن يفرق جدًا، لأن كل ما كانت فكرتك محددة وواضحة من البداية، كان أسهل إنك توصل لنتيجة قريبة من اللي موجود في دماغك.